上次介紹咗曹操有個武力極高嘅兒子，今次就講講一位幫佢打江山嘅養子，就係曹真。
曹真原本姓秦，佢爸爸係曹操摯友秦伯南，不過為咗救曹操而犧牲咗，所以曹操就收佢為養子，改埋姓曹。而有一次佢同曹操去狩獵，因一箭射死老虎而得曹操稱讚，仲將虎豹騎統領權交俾佢，後嚟隨著屢立戰功，官職不斷上升。到咗曹丕稱帝後，佢就被封為鎮西將軍都督雍州同涼州諸軍事，後再升至上軍大將軍同中軍大將軍之職。後嚟曹丕死咗，佢就同曹休、陳群、司馬懿輔政。魏明帝時期佢遷為大將軍。
講到曹真嘅最為人熟悉，就係佢力抗諸葛亮北代嘅事績。諸葛亮响228年進行第一次北伐，南安、天水、安定三郡叛魏歸蜀，曹真就獲遣督軍迎敵，後嚟街亭之戰後蜀軍退兵。曹真响蜀軍退兵後，認定諸葛亮之後必會進攻陳倉，於是就使將軍郝昭、王生守陳倉。果然响第二年春天，諸葛亮乘魏國進軍東吳而再次北伐，蜀軍進攻陳倉又真係俾曹真估中。由於魏軍早有防備，最後魏蜀雙方激戰二十幾日後蜀軍退兵，曹真因抗敵有功增邑及官遷大司馬。
後嚟曹真認為「蜀連出侵邊境，宜遂伐之。數道並入，可大克也」，魏明帝曹叡聽從其計，出兵伐蜀。諸葛亮知道魏軍來攻派李嚴率軍支援漢中太守魏延。後因大霖雨三十餘日，或棧道斷絕，所以明帝詔曹真還軍。公元231年，諸葛亮組織第四次北伐，曹真因病所以改由司馬懿對抗諸葛亮率領嘅蜀軍。可能唔少人記得力抗諸葛亮北伐係司馬懿，但呢個唔多唔少係受《三國演義》影響。
較可惜嘅係，曹真死咗之後，曹氏一族就再無出色嘅人才，最終俾司馬懿同佢啲仔有機可乘。所以有人就話如果唔係曹真早死，司馬懿想奪應該難度高好多。當然！歷史無如果。